मात मोतीयों वाली विराजे जसोल गढ़ रे माई ओ

मात मोतीयों वाली विराजे,
जसोल गढ़ रे माई ओ,
सरूप कंवर री सोभा घणेरी,
जग में जोत सवाई ओ।।

जोगीदास घर जामो पायो,
भाटी कुल रे माई ओ,
बदन कंवर रे कोख सु,
जन्मी सरूपल बाई ओ,
मात मोतीयो वाली विराजें,
जसोल गढ़ रे माई ओ।।

जसोल गढ़ जग में सावो,
मालाणी मरूधर माई ओ,
कल्याणसिंह जी संग रे माई,
सरूप कंवर परणाई ओ,
मात मोतीयो वाली विराजें,
जसोल गढ़ रे माई ओ।।

माजीसा रे कवर जनमीयो,
खुशी रावले में छाई ओ,
सोनेरा थाल बाजीया,
सईया मंगल गाई ओ,
मात मोतीयो वाली विराजें,
जसोल गढ़ रे माई ओ।।

सावण री बढ तीज सहेलियों,
हिल मिल मंगल गाई ओ,
कर सोला सिणगार माजीसा,
तिज खेलण जाई ओ,
मात मोतीयो वाली विराजें,
जसोल गढ़ रे माई ओ।।

लाल बना ने मुर्छा आई,
माता रे चिन्ता घट माही ओ,
लाल बनासा रा वियोग में,
मां आप पधारया वैकुंठ माही ओ,
मात मोतीयो वाली विराजें,
जसोल गढ़ रे माई ओ।।