वेल्लूर बडेर म्हाने लागे घणी प्यारी,
स्वर्ण नगरी ओ म्हाने लागे ओ प्यारी,
जटे बिराजे म्हारी आई माता हो,
म्हारी जगदम्बा हो,
कोई वेल्लूर बडेर में,
वेल्लूर बडेर म्हाने लागे घणी प्यारी।।
2081 संवत् फागन,
सुदी सातम जी,
वार ने गुरुवार ने मैया,
होवे प्रतिष्ठा भारी जी,
आई अनुयाई घणा हर्षावे ओ,
मैया भगत घणा ए हर्षावे जी,
कोई वेल्लूर बडेर में,
वेल्लूर बडेर म्हाने लागे घणी प्यारी।।
अरे रिद्धि सिद्धि विनायक साथे,
महाबली हनुमानजी,
सिंह चढे मां अम्बे बिराजे,
संग मे भेरुनाथ जी,
भगतो रा कारज मैया सारीया,
ओ मैया भगतो रा कारज एतो सारीया ओ,
कोई वेल्लूर बडेर में,
वेल्लूर बडेर म्हाने लागे घणी प्यारी।।
माया पती महादेवजी,
शिव शक्ति बिराजे जी,
महालक्ष्मी जी संग मे बिराजे,
साथे वीणा वाली जी,
राधेकृष्णा जी संग बिराजे जी,
ओ मैया अन्न धन रा भरीया ओ भंडारा जी,
कोई वेल्लूर बडेर में,
वेल्लूर बडेर म्हाने लागे घणी प्यारी।।
रुनीचे रा रामदेव जी,
पुरूषोत्तम श्री राम जी,
मात शीतला आप बिराजो,
नवग्रह परिवार जी,
सगला ही देव अटे बिराजे जी,
ओ मैया भगतो री आस पुरावे जी,
कोई वेल्लूर बडेर में,
वेल्लूर बडेर म्हाने लागे घणी प्यारी।।
वेल्लूर बडेर में आई माताजी री,
मूरत प्यारी लागे जी,
अखण्ड ज्योता जागे मैया री,
केसर बरसे भारी जी,
सगला परिवार हिल मिल आया जी,
ओ मैया थारा ही दर्शन पाया जी,
कोई वेल्लूर बडेर में,
वेल्लूर बडेर म्हाने लागे घणी प्यारी।।
खारीया नींव सु कोई,
जीमनी बाई पधारे जी,
माधव सिंह जी दिवान पधारे,
भगत मैया रा महान जी,
आई माताजी री बैल बधावे ओ,
मैया पल में तो दर्श दिखावे जी,
कोई वेल्लूर बडेर में,
वेल्लूर बडेर म्हाने लागे घणी प्यारी।।
सीरवी समाज मनावे मैया,
जय जयकार लगावे जी,
*रायपुर सु मनीष सीरवी*,
भजन भाव सु बनावे जी,
*अशोक प्रजापत* गुण गावे जी,
ओ मैया अनिता गुण थारा गावे जी,
कोई वेल्लूर बडेर में,
वेल्लूर बडेर म्हाने लागे घणी प्यारी।।
वेल्लूर बडेर म्हाने लागे घणी प्यारी,
स्वर्ण नगरी ओ म्हाने लागे ओ प्यारी,
जटे बिराजे म्हारी आई माता हो,
म्हारी जगदम्बा हो,
कोई वेल्लूर बडेर में,
वेल्लूर बडेर म्हाने लागे घणी प्यारी।।
गायक – अशोक जी प्रजापत & अनिता जी सिसोदिया।
प्रेषक / लेखक – मनीष सीरवी।
(रायपुर जिला ब्यावर राजस्थान)
9640557818
