नारायण घर में जनम लिया,
आया रमतोड़ा मदन गोपाल,
नारायण घर में जनम लियो।।
उत्तम कुळ पूजनीक जगत में,
बामण दायमाँ जाण,
उत्तम में उत्तम भळे रे,
सरव सोने वाळी खाण,
नारायण घर में जनम लियो।।
माता गोद भरी मनड़े में,
हालरिया हुलराय,
पलक पलक मुख-कमल निहारे,
हरख हरख सुख पाय,
नारायण घर में जनम लियो।।
सोने तारां बन्या पालणां,
रेशम तनीया डोर,
निरख-निरख आनंद उर छावे,
हीणड़े नन्दकिशोर,
नारायण घर में जनम लियो।।
मात हिण्डावै पूत पालण,
काजळिये री कोर,
सुरता लागी रहे लाल में,
धन में जियां चित चोर,
नारायण घर में जनम लियो।।
नणद भोजायां मंगल गावै,
बांधे बांदर माळ,
कानदान हरि रा गुण गावै,
छांड सकळ जंजाळ,
नारायण घर में जनम लियो।।
आया रमतोड़ा मदन गोपाल,
नारायण घर में जनम लिया,
नारायण घर में जनम लियो।।
गायक – सुरेश मोहन।
7709858130
