कुण जाणे बाबोजी म्हाने अइयाँ छोड़ चल्या जासी

कुण जाणे बाबोजी म्हाने,
अइयाँ छोड़ चल्या जासी,
ऐसा संत कोई बिरला ई होवै,
बाबोजी याद घणा आसी।।

बालपणे में संत बण गया,
टांई फतेहपुर पूजवायो,
भोळानाथजी बड़ा दयालु,
बऊ धाम थानै सम्भळायो,
श्री रतिनाथ.. नाम थे पायो..,
बऊधाम बणगी काशी,
कुण जाणै बाबोजी म्हानै,
अइयाँ छोड़ चल्या ज्यासी।।

थारा परचा थारी चर्चा,
सारी दुनिया आज करै,
शेखावाटी संत शिरोमणि,
सैं कै दिल पर राज करै,
ॐ शिव गोरक्ष… ॐ शिव गोरक्ष..,
जगमें गुंजतो ही जासी,
कुण जाणै बाबोजी म्हानै,
अइयाँ छोड़ चल्या ज्यासी।।

नाथ अनाथ का थे ही साथी,
थे ही गुरु पितु मायत हो,
भेदभाव थारै दर पे ना देख्यो,
थे भग्तां का सहायक हो,
कई आया और… कई आवैगा..,
थारै जिस्यो कोई कद आसी,
कुण जाणै बाबोजी म्हानै,
अइयाँ छोड़ चल्या ज्यासी।।

थारी किरपा राखज्यो बाबा,
भग्तां को मंगळ होवै,
थारी समाधि कै दर्शण सै,
जीवन म्हारो सफल होवै,
‘अम्बरीष’ कहवै… मनसे पुकारो..,
बाबोजी नेड़े दिख ज्यासी,
कुण जाणै बाबोजी म्हानै,
अइयाँ छोड़ चल्या ज्यासी।।