बिल्यूं मेले चालो रे भाई,
बिल्यूं नगर में मेलो भरिजे,
पीर गी संकलाई।।
बिल्यूं नगर गा भक्त शिरोमणि,
ऐसी भक्ति पाई,
चार कूट में नाम बिल्यूं गो,
ऐसी करी है कमाई,
बिल्यूं मेले चालो रे भाई।।
खिराज,बिन्जां,आदू,रुपा,
पीढी चार बताई,
पांचवी पीढी में मनफूल दादो,
ऐसी कला बरताई,
बिल्यूं मेले चालो रे भाई।।
भादवा सुदी पांचूं के दिन,
बहोत दुकाना आई,
चानणी छट गा आवे जातरी,
सात्यूं गी धोक लगाई,
बिल्यूं मेले चालो रे भाई।।
ढोल डेरू बाजै मेले में,
भगतां छड़ी समाई,
नेजां ऊपर धजा फरूंके,
गुगन छांवली गाई,
बिल्यूं मेले चालो रे भाई।।
बिल्यूं मेले चालो रे भाई,
बिल्यूं नगर में मेलो भरिजे,
पीर गी संकलाई।।
गायक – प्रेम भगत बिल्यूं धाम।
प्रेषक – समुन्द्र चेलासरी।
मो. – 8107115329
