ए वेगा आवो नी पधारो म्हारी अर्बुदा माँ

ए वेगा आवो नी पधारो,
म्हारी अर्बुदा माँ,
ए रमता आवो नी पधारो,
म्हारी अर्बुदा माँ,
ओ थारी घणी करां मनवार,
माताजी लुल लुल जोडा हाथ,
पधारो म्हारी अर्बुदा माँ।।

ओ मैया गढ़ रे आबु में थारो देवरो,
मैया गढ़ रे आबू में थारो देवरो,
मैया ऊंचे रे पहाड़ा में थारो बेसनों,
मैया ऊंचा रे भाखर में थारो बेसनो,
ओ थारा भगत आया थारे द्वार,
मैया सुनो भगतो री अरदास,
पधारो म्हारी अर्बुदा माँ।।

ओ मैया सिंह चढेने मां अर्बुदा आवे,
देवी सिंह चढ़ें अर्बुदा मैया आवे,
मैया काला गोरा भेरुजी ने संग लावे,
मैया काला गोरा भेरुजी ने संग लावे,
मैया सारे सगला रा काज,
मैया करे भगतो री सहाय,
पधारो म्हारी अर्बुदा माँ।।

ओ मैया परमार कुल मे पुजावीया,
मैया परमार कुल मे पुजावीया,
मैया दीन दुखियों रा कष्ट मिटावीया,
मैया दीन दुखियों रा कष्ट मिटावीया,
मैया नित उठ जोडु हाथ,
मैया हेलो सुनता ही आव,
पधारो म्हारी अर्बुदा माँ।।

ओ मैया चांदनी चौदस रो दिन आपरो,
मैया चांदनी चौदस रो दिन आपरो,
मैया राति जोगो दिरावा थारे नाम रो,
ओ मैया करा भजन में सारी रात,
मैया घूमर खेलो आय,
पधारो म्हारी अर्बुदा माँ।।

ओ मैया तुलसी देवी थारे द्वारे आवीया,
मैया मोटाराम जी थारे द्वारे आवीया,
मैया हरजी रामजी, तेजाराम जी आवीया,
ओ थारे दिवले री ज्योत जगाय,
मैया करजो किरपा आय,
पधारो म्हारी अर्बुदा माँ।।

ओ मैया पतासी देवी द्वारे आवीया,
ओ मैया फूलडा रो हार थारे लावीया,
ओ माडी पानी देवी पपली देवी आवीया,
थारे लापसी रो थाल सजावीया,
मैया रूच रूच भोग लगाय,
मै तो निव निव लागा थारे पांव,
पधारो म्हारी अर्बुदा माँ।।

ओ मैया राजूराम जी दिनेश जी ए आवीया,
थारे लाल कसुमल चुनड़ी लावीया,
मैया मनीष थारा दर्शन करवा आविया,
मैया थारे नाम रो जय जयकार लगावीया,
ओ मैया राखो छत्तर छाव,
मैया करदो भवसु पार,
पधारो म्हारी अर्बुदा माँ।।

ओ मैया निरमा मनीषा ए आवीया,
एतो माताजी रा हर जश गावीया,
मैया गौतम भावेश ने संग लावीया,
मैया दीपिका हर्षित ने संग लावीया,
ओ आया सीरवी हाम्बड़ परिवार,
मैया धरजो सिर पर हाथ,
पधारो म्हारी अर्बुदा माँ।।

ओ मैया रायपुर सु मनीष भजन बनावीया,
मैया मनीष सीरवी भजन बनावीया,
मैया अशोक प्रजापत गुण गावता,
ओ मैया लुल लुल शिश निवाय,
ओ मैया करदो बेडो पार,
पधारो म्हारी अर्बुदा माँ।।