नमण करूँ हे म्हारी मात नागणेचियां आरती लिरिक्स

नमण करूँ हे म्हारी मात नागणेचियां,
जळहळ जळहळ जोत जळे,
अवल अनादि सगत री आरती,
ढोल नगारा घुरे चंवर ढुळे,
नमन करूं हे म्हारी मात नागणेचियां,
जळहळ जळहळ जोत जळे।।

थळवट थान मढ नागोंणें थरपियो,
सगत सरूपी सातों रूप सरै,
तरुवर नीम्ब ज्यां नागणेची तूठी,
धन धन धूहड़ ध्यान धरै,
नमन करूं हे म्हारी मात नागणेचियां,
जळहळ जळहळ जोत जळे।।

परगट हुई गगन पथ पंखणी,
मरुधर आई निज भगत मते,
आप चक्रेश्वरी हिंगलाज आवडा,
हरख्या संत जन दुष्ट हते,
नमन करूं हे म्हारी मात नागणेचियां,
जळहळ जळहळ जोत जळे।।

सिंघ असवार अखिल जग सोहे,
विध विध रूप सकल विचरै,
नागण हुई अवल नारायणी,
झिलमिल मुखड़े तेज झरै,
नमन करूं हे म्हारी मात नागणेचियां,
जळहळ जळहळ जोत जळे।।

जुग जुग सहाय हुई जगदंबा,
सुर नर सुधिजन काज सजै,
अविचल राज अवन पर अंबा,
भवतारण त्रय लोक भजै,
नमन करूं हे म्हारी मात नागणेचियां,
जळहळ जळहळ जोत जळे।।

अनंत ईसरी रूप अनेकों,
कवि जन अगणित नाम कहें,
कमधज कुळ नागण कल्याणी,
रणचण्डी रखवाल रहें,
नमन करूं हे म्हारी मात नागणेचियां,
जळहळ जळहळ जोत जळे।।

सातम तिथि विधिवत सेवा,
नित सुमरण कर संत नमै,
नवरात्रि सज रूप नवेलो,
रास रचण नवलाख रमै,
नमन करूं हे म्हारी मात नागणेचियां,
जळहळ जळहळ जोत जळे।।

बाजे ताल मृदंगा बाजा,
कनक थाळ रणुंकार करै,
दीप धूप अजुआळे देवळ,
फरहर लाल धजा फहरै,
नमन करूं हे म्हारी मात नागणेचियां,
जळहळ जळहळ जोत जळे।।

पान पदार्थ ध्वजा पड़ाई,
श्रीफळ मिसरी भोग चड़े,
अर्पण कर जन करे आरती,
पूजन कर कर पांव पड़े,
नमन करूं हे म्हारी मात नागणेचियां,
जळहळ जळहळ जोत जळे।।

सुमरण आद साद सुण सगती,
सेवक भगती तव शरणे,
भूल चूक कर माफ भवानी,
भजन करत कवि ‘काळू’ भणे,
नमन करूं हे म्हारी मात नागणेचियां,
जळहळ जळहळ जोत जळे।।