झुँझन वाली गाडी में घुमाय ल्याऊं

झुँझन वाली गाडी में घुमाय ल्याऊं,
चालो चालो जी चालो चालो जी,
थाने दादी से मिलाय ल्याऊं,
झुंझुनूं वाली गाडी में घुमाय ल्याऊं।।

तर्ज – अंजन की सीटी में म्हारो।

झटपट खटपट टिकट कटा ल्यो,
छूट ज्यावेगी गाडी,
ई गाडी में बैठणीया ने,
मिलज्यावेगी लाडी,
चालो चालो थारी चालो चालो थारी,
जोड़ी जुड़वाय ल्याऊं,
झुंझुनूं वाली गाडी में घुमाय ल्याऊं।।

छुक छुक गाडी चाल पड़ी है,
आज्या ए बड़भागण,
दादीजी की किरपा से तू,
रहवै सदा सुहागण,
चालो चालो थारो चालो चालो थारो,
चुड़लो अमर कराय ल्याऊं,
झुंझुनूं वाली गाडी में घुमाय ल्याऊं।।

नाच कुदतो मस्ती में जो,
ई गाडी में बैठे,
ऊणकी गाडी सरपट भागै,
कदे न ठालो बैठे,
चालो चालो थारी चालो चालो थारी,
किस्मत चमकवाय ल्याऊं,
झुंझुनूं वाली गाडी में घुमाय ल्याऊं।।

खड़या खड़या के सोच रहया हो,
डीक रही सेठाणी,
एक बर गाडी छूट गई तो,
फेर के आणी जाणी,
चालो चालो थाने चालो चालो थाने,
दर्शण कराय ल्याऊं,
झुंझुनूं वाली गाडी में घुमाय ल्याऊं।।

भग्तां के संग अम्बरीष बोले,
गाडी छूट न ज्यावै,
थारी दया से म्हारी गाडी,
आगै बढ़ती जावै,
चालो चालो थारो चालो चालो थारो,
मंगळ कराय ल्याऊं,
झुंझुनूं वाली गाडी में घुमाय ल्याऊं।।