भाया कई जमानो आगियो रे,
आछिया खासा रिश्ता ने,
मोबाईल खागियो रे।।
भाया ने बतलावे कोने,
गणी टल्ड में रेवे,
चार बार मां बाप बुलावे,
एक बार हां केवे,
ने कोइ काण काईदो राखियो रे,
आछिया खासा रिश्ता ने,
मोबाईल खागियो रे।।
फेसबुक इंस्टे पे देखो,
कई हज़ारों फ्रेंड,
गांव में कोइ जाणे कोने,
असियो गज़ब को ट्रैंड,
हैलो राम नाम ने खागियों र,
आछिया खासा रिश्ता ने,
मोबाईल खागियो रे।।
रोटी कपड़ा मकान संग,
अब मोबाइल ज़रूरी,
रिचार्ज मैंगो होगियों पण,
राखबो मजबूरी,
फ्री को झासो दे अलगागियो र,
आछिया खासा रिश्ता ने,
मोबाईल खागियो रे।।
शब्द ठीक से बोल न पावे,
मोबाइल चालावे,
बाकी सब धाडा में जाओ,
पण मोबाइल तो छावे,
याका बचपन ने निगलगियो र,
आछिया खासा रिश्ता ने,
मोबाईल खागियो रे।।
दिन भर बैठा बैठा देखो,
रीलां ने हरकावे,
जवान तो भई पराबलो पण,
बूढ़ा रील बनावे,
एडो काई चस्को लागियो र,
आछिया खासा रिश्ता ने,
मोबाईल खागियो रे।।
घड़ी बंदबो भुलगया,
मोबाइल टेम बतावे,
टेप टीवी कंप्यूटर रेडिया,
कही नज़र ना आवे,
यो तो सबकी बैंड बजागियो र,
आछिया खासा रिश्ता ने,
मोबाईल खागियो रे।।
मोबाइल ने परों ले लिजियो,
संस्कार दे दीजियों,
छोड़ जगत का छाती कुट्टा,
थोडो टेम दे दीजियों,
‘शानू’ सांची सांची केगियों र,
आछिया खासा रिश्ता ने,
मोबाईल खागियो रे।।
भाया कई जमानो आगियो रे,
आछिया खासा रिश्ता ने,
मोबाईल खागियो रे।।
Singer – Shanu Regar
Mo. 9610489087
